من طرف يا خـالد إتصبر بي روحك الرأفة
وغير الصبر ياخوي ما عندي ليك وصفة
* * * * *
آمن بها الأقدار بي حكمته إتدفَّ
لا يدخل الشيطان ياخد بك اللفه
كل الحجارة تخيب حجر الغدر يلفا
قد رفعت الأقلام حبر الصحف جف
* * * * *
أحمل حبيب الروح جواك بي رأفة
قاسمو الألم والنوح وأمسح دموع زرفه
أبسم لو بي تحنان تلق الألم خفَّ
ولمسة حنان ووداد بيها المريض يشفا
* * * * *
حُسادك إغتالوك من قبل تتوفى
عمرو الفراق ما كان بين الأحبة شفا
بين الأحبة تذوب العزة والإنفة
ويضحى الشموخ معدوم وتتبدد الكُلفه
* * * * *
زمنو النصيح حباك وهواك بي إلفه
شافك فتى الأحلام بي حُبك إستكفى
إختارك إنت براك وخطابو مصطفة
في كفه خته الكون وختاك في كفه
* * * * *
كيفن تسيبو تفوت يوم يمشي مستشفى
وترجع تحبو شديد يومو اليطيب يشفى
شاركو الآلم قبال ما تشاركو في الزفه
وإن ما لقاك في الشين شن فايدت العِرفه
* * * * *
أصلو المرض ما عيب شان منو نتخف
والعيب نشوف الصاح بي نظرة مختلفه
داويها مهما تزيد أو ترتفع كُلفه
طايري القروش وكتين في الزي دي ما تلفا
* * * * *
كان دا أنت كانت هي ما فاتت الغرفه
إيدينه ليك لحاف بدل الوساد كتفه
تلقاها جم كرعيك إتوسدت طرفة
عينيها جافية النوم طول ليلة ما بتغفا
* * * * *
شوف للمناحه مكان شوف للحُزن صرفه
وانفض غُبار الهم سم الله بي عرفه
وأقعد قصاد حبك وأغمر قليبو وفا
شان تبقى أول زول قدامو يوم يشفا
* * * * *
حاتعود لك الأفراح بي توبة تتلف
وتبسم لك الأيام مهما الزمن لفَّ
داوي الحبيب بتعود الفرحه في طرفه
وحاسدك يقيف محتار أطرش وسط زفه
» مساحة للتعارف
» سلسلةمذكراتى الخاصة (الم الحروف )!!
» من القلب الى قلوبكم احبيتي
» ايــــــــــــاك والدموع..
» ابتهـــــــــــــــاج !!
» ابدأ دخولك بالصلاة على النبى (ص)
» شوربة خضار بطريقة ميمى ..
» شمار اليوم هههههه؟؟