سامحني واصفح يا حبيب ساقوني منك بالغصب
ندمانه ليه سبتك براك ياغالي في نص الدرِب
طَمني حالك إنت كيف والبي يهون مهما صِعِب
انا اصلي زول احساسو مات من بدري معتادة الضرب
كم مرة شانك يامناى من حنضل الالآم شرب
من خشمي تتقاطر دماي لو ينطق إسمك بالكضب
نفوني من نص الديار يوم عرفوا اني أنا ليك بحب
لكنو كلما زاد بُعادي لقيتو شخصك لي قرب
سجنوني بين اربع حيط زربوني من جيهتك زَرِب
لكني شايفاك جنبي يوت هل طيف خيالك يحتجب ؟
طالوني باليد واللسان وما فيَّ شيتاَ ما سلب
غير حبك الما قدروا يوم يصلوه ما ساكن القلب
واغرب شي اني انا بي وراك بنزلَّ واتهان وانضرب
لكني في لحظت لقاك بنساه زي الكان لعب
وريتم اني انا لي حبيب لو خنتو بشعر بالذنب
ساقيني راويني المحبة ومن حناني كمان شرب
يا خويا زي ريدت ولادك برضي للمريود بحب
والله لو حاس بالعلي مابترضى بيتي انا يتخرب
زي مابتدور لهم السمح لي برضو كان الخير تحب
لكني القى الدايره وين من ناس معين خيرن نضب
دون شورة زي بيع الملح باعوني في السوق بالجلب
ماراعوا لي امي الدوام تتباكى شاني وتنتحب
باريتلي زول بالجته بس وبارنك الروح والقلب
وانا قلبي لو فارق ضراك ما أظنو من بعدك كسب
متحمله الالآم براى شايلة الهموم مابتتحسب
مالقيتَ زول حسَّ العلي قاسمني همي معاي تعب
وعرفت صِح الم الضَرِب مابحسو زول غيرالضِرِب
والغربة كيف وعذابة مابيدريهو إلا المغترب
فوضت لي الله الأمر وكتين من التحنيس غلِب
مظلومه والمظلوم دعوتو من الإله مابتتحجب
بكتب لك اسع يا الحبيب متصبري وماسكي القلم
بكتب لك اسع والقليب مجروح وسابح في الالم
مكتوبي من شهر العسل شهر المرض شهر السجم
ملفوفة بي كفن الزفاف والحنة في أيديَّ دم
مرقت من سجن العذاب ووقعت في الزِل والوهم
ورضيت بي الواقع المرير وآمنت بي امر القسم
وقبلت بي الدايرنو لي كم قبلي مظلوم إنظلم
ويئست من عيشة عذاب راماني في زول مارحم
انسانة صِرت بلا طموح وبلا مبادي بلا قِيَم
وقنعتَ من الرحمة تب بس فيك ما إنقطع العشم
لا زلت ياك مالك القليب رغم انو امري انا إتحسم
ولا زلت بفخر بيك واقول إنت الحبيب في كل ملم
لا زلت بي اسمك بصيح لو حتي ساكت اتهجم
وبقولو قدام أي زول ما خايفه اصلو الموت هو كم
آخر رسالتي بطمنك أرجوكَ لا تشيل ليَّ هم
خليكَ في عهدك معاي ارجاني لا يطلك سأم
وأحفظني في جوَّاك فرح بلسم تداويبو الآلم
زي حفظي ليك بين الضلوع إنت وقليبي انا جم جم
وأخواني ما اظن يفرحوا وانا جرحي ينزف ما إلتأم
لابد ضميرن يوم يحس ويعرفوا إني أنا إنظلم
ويعودوا شان يبنوا الوقع كيفن بيبنوا الإتهدم
واكيد بيندموا للحصل لكنو مابفيد الندم
ديل ناس هوايتن الظُلم ديل خلو عيشتي بلا طعم
ما سووا بي حُكْم العقل ومابيندم الليهو إحتكم
ما الناس بتنقاس بالعقول ما بي الجلاليب والعمم
وانا ماسكه في حبل الصبر و في الله أملي انا ما إنعدم
زي ما النصيب فرقنا يوم يمكن تجمِّعنا القِسم
علاء أبو سير
الرياض/ يونيو 1999م
الأربعاء سبتمبر 18, 2013 9:15 pm من طرف عمرو
» مساحة للتعارف
الأربعاء سبتمبر 18, 2013 8:41 pm من طرف عمرو
» سلسلةمذكراتى الخاصة (الم الحروف )!!
الأربعاء مارس 06, 2013 5:58 pm من طرف المسافر
» من القلب الى قلوبكم احبيتي
الأربعاء مارس 06, 2013 5:33 pm من طرف المسافر
» ايــــــــــــاك والدموع..
الخميس فبراير 02, 2012 2:11 pm من طرف ميمى النحلة
» ابتهـــــــــــــــاج !!
الأربعاء فبراير 01, 2012 5:14 pm من طرف ميمى النحلة
» ابدأ دخولك بالصلاة على النبى (ص)
السبت يناير 28, 2012 4:12 pm من طرف عمر مقاصراوى
» شوربة خضار بطريقة ميمى ..
الأربعاء يناير 18, 2012 2:26 am من طرف ود السيد
» شمار اليوم هههههه؟؟
الأربعاء يناير 18, 2012 2:02 am من طرف ميمى النحلة