من طرف مناحات الشمــــوس ..
من ديوان الشعر :
الفاتحة فينى على البحر ..
للشاعر :
محمد احمد نقد الله..
النص:
تضاريس الحزن جواك
على كل الخرط اسمك
وعلى خط الوجع نلقاك
نغيب نتلاقا عن رسمك
فيا واضح وضوح والنيل
تعال راجين زمن حسمك
تعال ماتت حوافر الخيل
طوتنا الريح وغاب نسمك
أيا ممدود على الشريان
وتشتاقلك مجارى الدم
أيا مخلوق من الافراح
اذا غاب الفرح والنم
أيا عرقا يصب بالحيل
من الناس الصلاها الهم
أيا ترياق على جرحا
غريق جوانا طل وانسم
أيا ابنوس أيا باباى
أيا نخلا يرك فوق الخيال يتلم
ركيزة وأنت جودك نيل
على موجو بتقول حرم
هميم ساعة ينادو عليك
كريم والناقصة بيك تنتم
فيا واقف عليك الحال
تعال الحقنا شان ننجم
تعال امسح زمان النوح
وراك هالدنيا منحوسة
تعال سكت انين الروح
وراك بالفاقة محروسة
وتعال انزع سهام الليل
سنين فوق جوفنا مغروسة
تعال ياوافى راجنك
تعال بى خطة مدروسة
تعال نفض امانينا العليها استوطنت سوسة
تعال ابقالنا مركب نوح
اذا انكسرت عصا موسي
أيا واسوق على الحيضان
أيا ترتيل وصوت اذان
أيا قمرا بعد احزان
متين تمرق تشق الليل
نلاقيك صافى فى الحيشان
متين تفتح مدارج السيل
على الزرع الحرق عطشان
فيا انسان بتملا العين
بدفق منك الفيضان
معانيك مابترد الشين
مراميك دغرى والعنوان
اذا سكن الفقير فوق ايد
تمرق التانية بالمليان
ايا رايق بطعم البن
يجوط فينى المزاج والقاك
ترتب يااصيل جواى
اقوم شايل الشمس وابراك
على كل القبل نمرق
على الناس العديل تاباك
وبنقدر على ويلك
فيا قادم بنستناك
واذا طل الشعاع منك
منو البقدر يجير اعداك
ونستناك ...ونستناك
على جرح الشتات نرجاك
بنستناك على الوجع القديم نرجاك
ونستناك على مهلك على مهلك تعال نرجاك
ونستناك تضاريس الحزن جواك
على كل الخرط اسمك
وعلى خط الوجع نلقاك ..
ميمى النحلة ..
» مساحة للتعارف
» سلسلةمذكراتى الخاصة (الم الحروف )!!
» من القلب الى قلوبكم احبيتي
» ايــــــــــــاك والدموع..
» ابتهـــــــــــــــاج !!
» ابدأ دخولك بالصلاة على النبى (ص)
» شوربة خضار بطريقة ميمى ..
» شمار اليوم هههههه؟؟