بـــــــــــــــــــــــــــلادي أنا

بلادي أنا
بلاد ناساً في اول شيء
مواريثهم كتاب الله
وخيل مشدود
وسيف مسنون حداه درع
كتاتتيم تسرج الليل مع الحيران
وشيخاَ في الخلاوي ورع
وكم نخلات تهبهب فوق جروف الساق
وبقرة حلوبة تتضرع وليها ضرع
وساقية تصحي الليل مع الفجراوي
يبكي الليل ويدلف في جداولو دمع
يخدر في بلادي سلام....
خدرة شاربي موية النيل
تزرد في البوادي زرع
بلادي انا
بتشيل الناس كل الناس
وساع بخيرها لينا يسع
وتدفق مياه النيل على الوديان
بياض الفضة في وهج الهجير بتشع

بلادي سهول ((بلادي حقول))
بلادي الجنة للشافوها
او للبره بيها سمع

بلادي انا
بلاد ناساَ تكرم الضيف
وحتى الطير يجيها جيعان
من أطراف نقيها شبع
بلادي أنا
بلادي الصفقة الطنبور
وبنوتاَ تحاكي الخيل
يشابن زي جدي الريل
وشبالن مكنن في طريفو ودع

بلادي أمان.....بلادي حنان
وناسها حنان
يكفكفوا دمعة المفجوع
يبدوا الغيرعلى ذاتهم
يقسموا اللقمة بيناتهم
ويدوا الزاد
حتى ان كان مصيرهم جوع
يحبوا الدار
يموتوا عشان حقوق الجار
ويخوضوا النارعشان فد دمعة
وكيف الحال كان شافوها
سايل دموع....؟؟؟
ديل اهلي....
البقيف في الداره
وسط الداره
واتنبر وأقول للدنيا ديل اهلي
عرب ممزوجة بي دم
الزنوج الحارة
ديل اهلي
ديل قبيلتي
لما ادور افصل للبدور
فصلي....
اسياد قلبي والاحساس
وسافر في بحار شوقم زمان عقلي
أقول بعضي.....
الاقيهم تسربوا في مسارب
الروح بقوا كلي
محل قبلت
القاهم معايا
معايا زي ضلي
لو ما جيت من زي ديل
كان ....اسفاي
وا مأساتي
وا ذلي.....
تصور كيف يكون الحال
لو ما كنت سوداني
واهل الحارة ما اهلي ؟
تصور كيف...؟؟؟!!!....